Bu yolun çəkilişinə 2008-ci ilin mayında start verilmişdi.İşlərin başlandığı ilk dövrlərdən yolun çəkilişinə 7 min işçi qüvvəsi və 3 minə yaxın xüsusi texnika səfərbər edilmişdi. Bakı-Quba-Rusiya Federasiyası ilə dövlət sərhədi avtomobil yolu beynəlxalq əhəmiyyət daşıyır. Bu səbəbdən də işlərin qısa müddətdə başa çatdırılması zərurətini nəzərə alan Şirkət rəhbərliyi işləri 3 növbəli iş rejimində qurdu. Ərazidə 10 səyyar qərargah və 5 səyyar qaraj yaradıldı. Ərazidə inşa edilən 12 beton zavodu isə işlərin daha da sürətlə aparılmasına birbaşa xidmət edirdi.İşlərin başlanmasından ötən 1 il ərzində 118 km-lik ərazidə yola beton örtüyün salınması işləri başa çatdırıldı. Yolun beton örtüyünün ümumi qalınlığı 28 sm-dir. Beton örtüyünün qalın olmasının səbəbi həmin ərazidə yük maşınlarının çoxluq təşkil etməsidir. Bu irimiqyaslı layihədə işlər yolu 16-44 km, 44-89 km, 89-134 km-lik hissələrə bölməklə, mərhələli şəkildə aparılıb.

Betonlama prosesi Almaniyadan gətirilən, "Wirtgen" şirkətinin betonsalan maşınları vasitəsilə həyata keçirilib. Yol çəklişi üçün ən müasir texnologiya hesab edilən, 4 hissəli betonsalan maşın elektron idarəetmə sistemi ilə təchiz edilib. Betonsalan maşın beton örtüyü çəkdikdən sonra, hazır olan yolun üzərinə püskürmə üsulu ilə kimyəvi tərkibli xüsusi məhlul çiləyir. Həmin məhlul isə, betonun tez bir zamanda bərkiməsinin qarşısını alaraq, 24 saat ərzində betonun səthində nazik çatların belə yaranmasının qarşısını alır və günəş işığına qarşı davamlılığı artırır.

2008-ci il avqust ayının 22-də bu avtomagistrala daxil olan Bakı-Sumqayıt yolu bütünlüklə tamamlanaraq istifadəyə verilib. Yolun bu hissəsinin açılış mərasimində ölkə prezidenti cənab İlham Əliyev iştirak edib.

Qeyd edək ki, Bakı-Quba-Rusiya Federasiyası ilə dövlət sərhədi avtomobil yolunun 11-ci km-də tunel tipli yolötürücünün və 16-cı km-də körpü tipli yolötürücünün tikintisi də «Akkord» Şirkətlər Qrupu tərəfindən həyata keçirilib və 2009-cu il fevral ayının 12-də ölkə Prezidentinin iştirak etdiyi açılış mərasimi ilə istifadəyə verilib.

11-ci km-də - Xırdalan dairəsində tikilən yolötürücünün uzunluğu yanaşma yollarla birlikdə 700 metr, eni 20 metr, tunelin hündürlüyü 5 metrdir. Bu yolötürücünün əsas funksiyası şimal istiqamətində gedib-gələn tranzit nəqliyyat vasitələrinin maneəsiz hərəkətinin təmin edilməsindən ibarətdir. 
16-cı km-də tikilən yol qovşağı üçün körpü-yolötürücü Xırdalan qəsəbəsindən Sumqayıt və Bakı istiqamətində gedən avtomobillərin əsas magistralla müxtəlif səviyyəli kəsişməsini təmin edir. Üç aşırımlı yolötürücünün eni 20, uzunluğu 63 metrdir. Yolötürücünün hər iki tərəfində 1,5 metr enində piyada səkiləri nəzərdə tutulub. Qurğunun aşırım hissəsi yığma dəmir-beton tirlərdən ibarətdir. Bu tirlər “Akkord”un müvafiq müəssisəsində istehsal olunur. Aşırım sxemi 15+33+15 m-dir.

Ötən dövr ərzində 118 kilometrlik ərazi boyu yola 28-30 sm qalınlığında beton döşənib, yolla kəsişən kommunikasiya xətləri dəyişdirilib, suötürücü qurğular, körpü və keçidlərin tikintisi layihə üzrə həyata keçirilib.