Yuxarıda qeyd edilən 426 binanın inşası 150 tikinti təşkilatı tərəfindən aparılır.
Ən çox yeni tikili əvvəlki aylarda olduğu kimi, Yasamal rayonu ərazisində aparılır. Xətai və Nəsimi rayonları bu baxımdan sonrakı yerlərdəki mövqelərini qoruyurlar. Qeyd edilən bu üç rayon üzrə tikintisi aparılan yeni binaların ümumi tikinti portfelindəki payı 65.5% təşkil etmişdir. Qalan rayonlarda isə hələlik tikintinin həcmində hər hansı ciddi dəyişiklik baş verməmişdir.
Şəhər üzrə satış üçün təklif olunmuş mənzillərin orta qiyməti cari ilin yanvar ayı ilə müqayisədə fevralda 1.5% azalaraq 897$/kv.metrdən 883$/kv.metrə enib. Orta qiymətə uyğun olaraq qiymət indeksi də 5,1 bənd azalaraq 335,6 bəndində qərarlaşıb. Qiymət azalması demək olar ki, əksər binalarda qeydə alınmışdır. Əsas səbəb kimi isə tələbin kəskin azalması və bazarın bu seqmenti üzrə dinamikanın mənfiyə doğru dəyişməsidir. Şəhər üzrə tikintisi aparılan binalarda orta mənzil sahəsi keçən aydakı 122.3 kv.metrə qarşı 121.6 kv.metr olmuşdur. Orta blok göstəricisi keçən ayla müqayisədə 4,1% artaraq 2,5 olmuşdur. Orta mərtəbə göstəricisi isə ötən ay olduğu kimi 15,2 mərtəbə təşkil edib.
Yanvar ayı ilə müqayisədə fevralda heç bir rayonda qiymət artımı qeydə alınmamışdır.
Ən çox azalma isə Yasamal rayonunda (3,4%) qeydə alınıb. Yasamal rayonunda qiymətlərin kəskin azalmasının əsas səbəbi kimi tikinti həcminin sürətlə artdığı yeni Yasamal yaşayış massivində təklifin artımı hesabına tələbin aşağı düşməsi olub.
Ötən aylardakı kimi yeni tikililərdə 3 otaqlı mənzillər daha çox üstünlük təşkil edir. 5 otaqlı mənzillər əsasən şəhərin 1 zonasında üstünlük təşkil edir, 1 otaqlı mənzillər isə daha çox 3- cü zonanın payına düşür.

www.ebi.org.az