Təklifin nisbi azalması mənzillərin qiymət dinamikasının kəskin azalmasının qarşısını almışdır. Araşdırmalar göstərir ki, təklifin sabit qalmasına baxmayaraq ümumi təklif portfelində yeni tikililərinin payının (60.1%) artımı davam edir. Təkrar bazardakı yeni tikililərin sayı ötən ayla müqayisədə (0,7%) artmışdır. Bazarda təklifin nisbi (-1.0%) azalması ilə yanaşı, orta qiymət də 0.8% azalmışdır. İpoteka kreditləşməsinin təsiri nəticəsində əmlakın bu növü üzrə likvid dəyər sabit qalsa da, risk dərəcəsi hələ də yüksək olaraq qalmışdır.
Aparılan araşdırmalardan məlum olub ki, təkrar bazarda şəhər üzrə mənzillərin qiymət indeksi qiymətə müvafiq olaraq azalıb (-0.8%).
Fevral ayında aktivlik əmsalına görə ən cəlbedici rayonlar ötən ay olduğu kimi Xətai, Yasamal və Nərimanov rayonları olub. Bu rayonların ən vacib cəhəti ipoteka üçün daha səmərəli olmaları göstərilir.
Təkrar mənzil bazarında qiymət indeksi 1.8 bənd azalaraq 217.7 bənd səviyəsində qərarlaşıb
Aparılan araşdırmalara əsasən fevralda təklif 1.0% azalmış və nəticədə bazara satış üçün təklif olunan mənzillərin sayı 6950-yə enmişdir.
Yasamal, Nəsimi, Nərimanov və Xətai rayonlarının təklif portfelindək payı mütləq çoxluq təşkil etmiş və bu 4 rayonun ümumi təklif portfelindəki payı birlikdə 79,7%-ə bərabər olub.
Fevral ayında otaqlar üzrə 3, 4 və 5 otaqlı mənzillərin sayında azalma qeydə alınıb ki, bu əsasən 4 otaqlılarda daha çox olub (2,2%). 1 və 2 otaqlı mənzillərin təklif üzrə payında isə artım müşahidə olunub. Ən çox artım 2 otaqlı mənzillərdə qeydə alınıb (1.7%). Yeni tikililərin satışında yaranan problemlərdən sonra tikinti şirkətlərinin bir çoxu mənzillərini satmaq məqsədilə böyük kvadratlı (4 və 5 otaqlılar üzrə) mənzilləri 2 və 1 otaqlı mənzillərə bölməklə marketinq və satış siyasətlərində yeniliklər etməyə çalışırlar. Bu səbəbdən də tədricən təkrar bazara daxil olan yeni tikililərin hesabına yenidən 2 otaqlı mənzillər ümumi portfeldə 3 otaqlı mənzillərə yaxınlaşmaqdadır.
Bazar üzrə orta qiymətlərin təhlili göstərib ki, fevral ayında qiymət indeksində 1.8 bənd azalma müşahidə edilib. Orta qiymət 0,8% azalaraq ötən ay qeydə alınmış 1175 $/kv.m-dən 1166 $/kv.m-ə enmiş və 2007-ci ilin yanvar ayında qeydə alınan nəticəyə enmişdir.
Ay ərzində heç bir rayonda qiymət artımı qeydə alınmayıb. Fevralda ən çox qiymət azalması Suraxanı rayonunda (1.2%) qeydə alınıb. Bazarda mənzillərin 1 kv.m-in orta qiymətindən (1166 ABŞ dolları) aşağı olan mənzillər ümumi portfeldə daha çox paya, yəni 57,6%-ə malikdir. Mənzillərin orta otaq göstəricisi 2.52, hər otağın orta satış qiyməti 45679 ABŞ dolları, mənzilin orta qiyməti isə 115110 ABŞ dolları təşkil edib.

www.ebi.org.az