Boş torpaqlarda tikilən fərdi yaşayış evlərinin sərhədi şəhərin kənarına və şəhərətrafı ərazilərə (III və IV zonalar üzrə) doğru genişlənməkdə davam etsə də, tikintinin tempində azalma müşahidə olunub. Ümumiyyətlə son iki ildə fərdi yaşayış evlərinin tikintisi üzrə dinamika əsasən ilin yalnız II rübünün ilk iki ayında müşahidə olunur.
Iyul ayında bazara təklif olunan ümumi 794,1 ha torpaq sahəsinin 78,0%-ni boş sahə, qalanını isə qeyri-yaşayış sahələri və köhnə yaşayış sahələri təşkil edib. İyul ayında torpaq bazarında mövsüm üçün xarakterik olmayan və böhrandan bu yana ilk dəfə təklifə çıxarılan torpaq sahələrinin qiymətində nisbi artım müşahidə olunmuşdur.
Torpaq bazarının şəhərətrafı və paytaxtdan kənar ərazilərə doğru genişlənməsi tendensiyası iyul ayında yay mövsümünün dərinləşməsi ilə əlaqədar bir qədər artıb. Ay ərzində torpaq üzərində bağlanan alqı-satqı əqdlərinin sayında ötən ayla müqayisədə stabillik müşahidə olunub və bazarın bu seqmenti üzrə aktivlik əvvəlki aya nisbətən nisbi şəkildə mənfiyə doğru dəyişib.
Aparılan bazar araşdırmaları göstərir ki, şəhərin mərkəzində torpaq sahələrinin həddən artıq məhdudlaşması I zonada tələb və təklifin strukturunun dəyişməsi ilə yanaşı, qiymətlərin stabilləşməsinə səbəb olmuşdur. Söküntü işlərinin azalmasına baxmayaraq I zonada torpağın bazar qiyməti hələ də real dəyərindən baha olaraq qalmaqdadır.
Ötən aylardan fərqli olaraq iyul ayında Bakı şəhəri üzrə torpaq bazarında orta qiymətlərdə son iki il ərzində ilk dəfə qiymət artımı müşahidə olunmuşdur. Qiymətlərin artımı əsasən şəhərin II və III zonaları üzrə qeydə alınmışdır. Ay ərzində bazara çıxarılan 1 sot torpağın orta qiyməti 0.5% artlaraq 14026 $/sot səviyyəsindən 14136$/sot səviyyəsinə qalxıb.
Ay ərzində qiymət artımı əsasən şəhərin II və III zonaları üzrə qeydə alınmışdır. I və IV zonalarda isə torpaq qiymətləri azalmaqda davam edir. Bu, həmin zonalar üzrə torpağın bazar qiymətinin real dəyərindən baha olması ilə bağlıdır.
Şəhərin mərkəzində qiymətlərin həddən artıq yüksək olması, I zonada tələbin aşağı düşməsi ilə paralel qiymətlərin də azalmasına səbəb olub. İyundan fərqli olaraq iyul ayında IV zonada qiymət azalması tədricən nisbi xarakter daşımağa başlamışdır. Qiymətlərin hələ də real dəyərdən yüksək olması torpağın gəlirliyinə ciddi təsir göstərməsə də, bazarın bu seqmentində ekspozisiya müddətinin artmasına və likvidlik dərəcəsinin düşməsinə təsir göstərib. Bütün bunlarla yanaşı, torpaq sahələrinin ipoteka prosesində girov predmeti kimi qəbul olunmaması daşınmaz əmlak subyekti kimi mülkiyyətin bu növünə olan marağı xeyli zəiflədib. Son aylar bazarda baş verən proseslər bazarın bu seqmenti ilə aparılan əməliyyatlarda risk dərəcəsini artırıb.
İyulda rayonlar üzrə ən çox qiymət azalması Səbail (-0.6%) rayonunda qeydə alınmışdır. Ən çox qiymət artımı isə Qaradağ rayonu üzrə (0,9%) qeydə alınmışdır.
Bütün bunlarla yanaşı, hazırda torpaq bazarında nisbətən aktiv rayonlar sırasına Binəqədi və Xətai rayonları başçılıq edirlər. Ən passiv rayon isə ötən aylar olduğu kimi Nəsimi rayonudur.
Ötən ay torpaq bazarına təklif olunan ən bahalı torpaq sahəsi 250000 $sot Nəsimi (Kubinka) rayonunda, ən ucuz torpaq sahəsi isə 350$sot Abşeron (Pirəkəşkül qəsəbəsi) rayonunda qeydə alınmışdır.

www.ebi.org.az