Boş torpaqlarda tikilən fərdi yaşayış evlərinin sərhədi şəhərin kənarına və şəhərətrafı ərazilərə (III və IV zonalar üzrə) doğru genişlənməkdə davam etsə də, tikintinin tempində mövsümi amillərlə bağlı azalma müşahidə olunub. Ümumiyyətlə son iki ildə fərdi yaşayış evlərinin tikintisi üzrə dinamika əsasən ilin II rübünün ilk iki ayında müşahidə olunur.
Aparılan söküntü işləri zamanı dövlət tərəfindən sosial obyektlərin tikintisinə, yolların salınmasına və genişləndirilməsinə daha çox rast gəlinib. Regionların sosial-iqtisadi inkişaf proqramı ilə bağlı bu tendensiya daha da dərinləşməkdədir. İndi infrastruktur tikintisinin coğrafiyası artıq daha çox mərkəzdən kənar ərazilərə doğru genişlənməkdədir.
Sentyabr ayında bazara təklif olunan ümumi 792,8 ha torpaq sahəsinin 77,8%-ni boş sahə, qalanını isə qeyri-yaşayış sahələri və köhnə yaşayış sahələri təşkil edib. Sentyabr ayında torpaq bazarında təklifə çıxarılan torpaq sahələrinin qiymətində nisbi artım (0.8%) müşahidə olunmuşdur.
Torpaq bazarının şəhərətrafı və paytaxtdan kənar ərazilərə doğru genişlənməsi tendensiyası sentyabr ayında payız mövsümünün başlaması ilə əlaqədar bir qədər stabilləşib. Ay ərzində torpaq üzərində bağlanan alqı-satqı əqdlərinin sayında ötən ayla müqayisədə stabillik müşahidə olunub və bazarın bu seqmenti üzrə aktivlik əvvəlki aya nisbətən nisbi şəkildə müsbətə doğru dəyişib.
Aparılan bazar araşdırmaları göstərir ki, şəhərin mərkəzində torpaq sahələrinin həddən artıq məhdudlaşması I zonada tələb və təklifin strukturunun dəyişməsi ilə yanaşı, qiymətlərin stabilləşməsinə səbəb olmuşdur. Söküntü işlərinin azalmasına baxmayaraq I zonada torpağın bazar qiyməti hələ də real dəyərindən baha olaraq qalmaqdadır.
Bazarda torpağın ekspozisiya müddəti əvvəlki ayla müqayisədə artmışdır (1.2%).
Sentyabr ayında Bakı şəhəri üzrə torpaq bazarında orta qiymətlərdə nisbi artım müşahidə olunmuşdur. Ay ərzində bazara çıxarılan 1 sot torpağın orta qiyməti 14132 $/sot səviyyəsindən 14243$/sot səviyyəsinə qalxsa da, artım nisbi xarakter daşıdığından indekslərə də nisbi təsir göstərmişdir.
Ay ərzində qiymət artımı əsasən şəhərin II və III zonaları üzrə qeydə alınmışdır. I və IV zonalarda isə torpaq qiymətlərində nisbi azalma müşahidə edilmişdir. Bu, həmin zonalar üzrə torpağın bazar qiymətinin real dəyərindən baha olması ilə bağlıdır.
Şəhərin mərkəzində qiymətlərin həddən artıq yüksək olması, I zonada tələbin aşağı düşməsi ilə paralel qiymətlərin də azalmasına səbəb olub. Ötən aylardan fərqli olaraq sentyabr ayında IV zonada qiymət azalması tədricən nisbi xarakter daşımağa başlamışdır.
Qiymətlərin hələ də real dəyərdən yüksək olması torpağın gəlirliyinə ciddi təsir göstərməsə də, bazarın bu seqmentində ekspozisiya müddətinin artmasına və likvidlik dərəcəsinin düşməsinə təsir göstərib. Bütün bunlarla yanaşı torpaq sahələrinin ipoteka prosesində girov predmeti kimi qəbul olunmaması daşınmaz əmlak subyekti kimi mülkiyyətin bu növünə olan marağın hələ də aşağı olması ilə nəticələnir. Son aylar bazarda baş verən proseslər bazarın bu seqmenti ilə aparılan əməliyyatlarda risk dərəcəsini nisbi azaltmışdır.
Sentyabrda rayonlar üzrə ən çox qiymət azalması Binəqədi (-0.9%) rayonunda, ən çox qiymət artımı isə Xətai rayonu üzrə (0,7%) qeydə alınmışdır.
Bütün bunlarla yanaşı, hazırda torpaq bazarında nisbətən aktiv rayonlar sırasına Binəqədi və Xətai rayonları başçılıq edirlər. Ən passiv rayon isə ötən aylar olduğu kimi Nəsimi rayonudur.
Ötən ay torpaq bazarına təklif olunan ən bahalı torpaq sahəsi 230000 $sot Nəsimi (Nəsimi bazarı yaxınlığı) rayonunda, ən ucuz torpaq sahəsi isə 350 $sot Abşeron (Pirəkəşkül qəsəbəsi) rayonunda qeydə alınmışdır.

www.ebi.org.az