Bu seqment üzrə bazarda bağlanan əqdlərin dinamikası ötən aya nisbətən artıb (3.1%). «Əmlak Bazarı İştirakçıları» İctimai Birliyinin monitorinq qrupu tərəfindən aparılan bazar araşdırmalarına əsasən Sentyabrda bazara təklif olunan qeyri-yaşayış sahələrinin sayı 2,2% artıbdır. Bazarda təklif qiymətlərinin nisbi artımına baxmayaraq, tələbin aşağı olması ekspozisiya müddətinin artımına təsir göstərmişdir. Ekspozisiya müddətinin artımı müvafiq olaraq əmlakın bu növü üzrə risk dərəcəsini də artırıbdır.
Sentyabr ayı ərzində Bakı şəhəri üzrə kommersiya məqsədilə istifadə edilən əmlakın orta satış qiymətində 1.2% artım, icarə qiymətlərində isə 0.5% azalma qeydə alınıb. Bakı şəhəri üzrə 1 kv.m qeyri-yaşayış sahəsinin orta qiyməti (təklif üzrə) avqustda qeydə alınan 2938 ABŞ dollarından 2973 dollara enib. Aparılan araşdırmalara əsasən qiymət artımı ötən rüblə müqayisədə 0.8% təşkil edib. Qeyri-yaşayış sahələrinin qiymətləri ötən ilin müvafiq dövründə qeydə alınmış nəticədən 0.6% aşağı olaraq qalır.
Bakı şəhərində qeyri-yaşayış sahələrinin qiymətlərini zonalar üzrə təhlil etdikdə, qiymətlərin stabilləşməsi zonalar üzrə qiymətlərə də təsir göstərmişdir. II və III zonada qiymətlərin nisbi artımı (müvafiq olaraq 0.5%, 1.3%) müşahidə olunduğu halda, digər zonalarda müvafiq olaraq 0.3%, 0.6% qiymət azalması baş verib.
Ay ərzində qeyri-yaşayış sahələri bazarında ən çox qiymət artımı Qaradağ rayonunda (2,2%) ən çox  qiymət azalması isə Suraxanı rayonunda (1,1%) müşahidə olunmuşdur.
Bazarda qeyri-yaşayış sahələrinin 1 kv.m-nin orta qiymətindən (2973 ABŞ dolları) aşağı olan obyektlər ümumi portfeldə 51,7% paya malik olmuşdur.

www.ebi.org.az