Azərbaycan İpoteka Fondunun (AİF) xətti ilə ipoteka kreditlərinin verilməsi qaydaları dəyişdirilib.
Bu il noyabr ayında qüvvəyə minən dəyişikliklərə əsasən, ipoteka kreditinin alınması üçün tələb olunan ilkin məbləğ alınan əmlakın qiymətinin 15%-dən 20%-ə qaldırılıb. Yəni, məsələn, 50 min manatlıq ev almaq istəyən müştəri indiyədək bu məbləğin 7,5 min manatını ödəyirdisə, artıq həmin məbləğ 10 min manata çatdırılıb. 

«APA-Economics»in AİF-in rəsmi internet səhifəsinə istinadən verdiyi məlumata görə, qaydalarda edilmiş digər dəyişikliyə əsasən, faktiki olaraq bir ailənin birdən artıq ipoteka krediti götürməsi qadağan edilib. İpoteka Fondunun «Standart tələblər»inə edilən dəyişikliyə görə, «İpoteka krediti götürmüş borcalan ərinin/arvadının götürdüyü ipoteka krediti üzrə birgə borcalan qismində çıxış edə bilməz». Başqa sözlə, kimsə ipoteka krediti götürübsə, həmin şəxs həyat yoldaşının ipoteka krediti götürməsində birgə borcalan kimi iştirak edə bilməyəcək. 

Fonddan bildirilib ki, bu addım maaşı yüksək olan adamların birdən artıq ipoteka götürməsinin qarşısını almaq üçün atılıb. «Bəzən maaşları yüksək olan və artıq bir kredit götürmüş insanlar, gəliri simvolik olan həyat yoldaşlarının adına ikinci krediti götürürlər. Bu zaman krediti götürən tərəf kimi rəsmi olaraq həmin şəxsin həyat yoldaşı çıxış etsə də, əslində krediti birinci şəxs ödəyir. Yəni, iki ipoteka kreditini faktiki olaraq bir nəfər ödəyir. Bu isə riski artıran hal sayılır», - deyə AİF-dən bildirilib.

Bununla yanaşı, qeyd etmək lazımdır ki, bu məhdudiyyət digər yaxın qohumlara – ata-ana və bacı-qardaşa aid deyil. Yəni, artıq ipoteka krediti götürmüş şəxs, məsələn, öz qardaş və ya bacısının ipoteka krediti götürdüyü halda birgə borcalan kimi çıxış edə bilər.

Xatırladaq ki, ipoteka kreditlərinin verilməsi zamanı sui-istifadə halları və risklərin azaldılması üçün bəzi məhdudiyyətlər bundan bir neçə ay əvvəl də tətbiq edilib. Belə ki, iyulun 1-dən etibarən ipoteka krediti ilə alınan mənzilin satıcısı ilə alıcısı arasında qohumluq əlaqəsi ilə bağlı tələblər daha da sərtləşdirilib.

Həmin dəyişikliklərə əsasən, həyat yoldaşının valideynlərindən, bacı-qardaşı və baba-nənəsi, eləcə də bacı-qardaşın həyat yoldaşından ipoteka krediti ilə ev alıb-satmağa icazə evrilmir.

Bundan başqa, elə həmin vaxt qüvəyə minmiş dəyişikliklərə görə, ümumi paylı mülkiyyətdə olan daşınmaz əmlakın bir hissəsi ayrılıqda ipoteka predmeti kimi çıxış edə bilməz. Başqa sözlə, əvvəllər hər kəs ipoteka krediti almaq üçün belə mülkiyyətdə öz payını ayrıca girov qoya bilərdi. İndi bu mülkiyyət ancaq bütövlüklə girov qoyula bilər.

evim.az