Bakı, 22 iyun, SalamNews. Dünya Bankının dəstəyi ilə Azərbaycanda həyata keçirilən “Daşınmaz əmlakın qeydiyyatı” layihəsi çərçivəsində Əmlak Məsələləri Dövlət Komitəsinin (ƏMDK) fəaliyyətinin daha da təkmilləşdirilməsi ilə bağlı işlər görülür.
ƏMDK-nın mətbuat xidmətindən SalamNews-a verilən məlumata görə, komitəsi üçün beynəlxalq məsləhətçilərin iştirakı ilə beşillik strateji planın və birillik fəaliyyət planının hazırlanmasına başlanılıb. Bu istiqamətdə bir sıra inkişaf etmiş Avropa ölkələrinin aidiyyəti qurumlarının fəaliyyətləri ilə tanışlıq olub və təcrübə mübadiləsi həyata keçirilib.
Layihəyə uyğun olaraq, ƏMDK üçün 2012-2013-cü illərdə daşınmaz əmlakın qeydiyyatı, vahid kadastrı və dövlət əmlakının idarə edilməsi sahələrində planlaşdırma, resursların səfərbər olunması və maliyyələşdirmə, komitənin əsasnaməsi ilə müəyyən edilmiş fəaliyyətin icrası zamanı səmərəliliyin daha da artırılmasının dəstəklənməsi məqsədi ilə biznes planın hazırlanması və korporativ strategiyasının formalaşdırılması nəzərdə tutulub.
Strateji plan komitə tərəfindən xidmətlərin göstərilməsi (xidmət standartları daxil olmaqla), kadr resurslarının inkişafı, ümumi maliyyələşdirmə variantları və ictimaiyyətə davamlı və qənaətcil xidmətlərin göstərilməsi sahəsində korporativ strategiyanın hazırlanmasını və s. əhatə edəcək.
Beşillik strateji planın hazırlanması çərçivəsində komitədə daxili idarəetmənin təkmilləşdirilməsi, komitə və onun qurumlarında idarəetmədə səmərəli və şəffaf fəaliyyət mexanizmlərinin tətbiq edilməsi, daşınmaz əmlakın qeydiyyatı və kadastrı sistemlərinin davamlı fəaliyyəti üzrə biznes planların hazırlanması və xidmətlə bağlı standartların inkişaf etdirilməsi nəzərdə tutulur.
Beşillik strateji plan və birillik fəaliyyət planı 12 ay müddətində hazırlanacaq. Artıq bununla əlaqədar əsas beynəlxalq məsləhətçi və digər məsləhətçilər müəyyən edilib. Bu məqsədlə beynəlxalq məsləhətçilərin ölkəmizə ilk səfəri olub. İlk səfərin məqsədi ilkin məlumatların araşdırılması və işlərin planlaşdırılmasıdır.
Səfər çərçivəsində Əmlak Məsələləri Dövlət Komitəsinin Aparatında və tabeliyində olan qurumlarda işgüzar görüşlər keçirilmiş və qurumun müxtəlif istiqamətlərindəki fəaliyyətləri öyrənilib.
“Daşınmaz əmlakın qeydiyyatı” layihəsinin başlıca məqsədi ölkədə daşınmaz əmlak bazarını, habelə dövlət əmlakının idarə edilməsi və istifadəsini dəstəkləyən daşınmaz əmlakın etibarlı, şəffaf və səmərəli qeydiyyatını təmin etməkdir. Ümumiyyətlə, bu layihə daşınmaz əmlak bazarına və bütün daşınmaz əmlak sahiblərinə dəstək verəcək.
