|
| |
| |
Bakı. Əli Əhmədov - APA-ECONOMICS. Türkiyənin tanınmış iş adamı Əli İbrahim Ağaoğlu Azərbaycanda dənizdə şəhər - «Khazar Islands» layihəsini reallaşdıran «Avesta» konserni rəhbərliyinin dəvəti ilə Bakıda səfərdə olub.
Onun başçılıq etdiyi «Agaoglu Group» 1990-cu ildən Türkiyədə iri tikinti layihələri reallaşdırmaqla məşğuldur. İndiyədək şirkət «My World», «My Office», «My Towerland» kimi yüksək keyfiyyətli tikinti layihələri həyata keçirib. Hazırda «Agaoglu Group»un fəaliyyəti tikinti və kurort biznesi kimi sahələri əhatə edir. Məşhur «Forbes» jurnalının 2011-ci ildə apardığı araşdırmalara əsasən, Ə.Ağaoğlu 2,1 mlrd. dollar kapitalla Türkiyədə 10-cu, dünyada isə 564-cü varlı və nüfuzlu şəxsdir. Məşhur milyarder Bakıda olduğu müddətdə «APA-ECONOMICS»ə müsahibə verib.
- Əli bəy, «Khazar Islands» layihəsi ilə tanış oldunuzmu?
- Bəli, layihə ilə tanış oldum, inanılmaz dərəcədə təsirləndim. Dünya miqyaslı layihədir. İnşaat işləri ilə də tanış oldum, işlərin necə getdiyini gördüm. İşlər yaxşı gedir. Həm texniki göstəricilər, həm də memarlıq baxımından dünya miqyasında çox uğurlu və möhtəşəm bir layihədir.
- Bu layihəyə qoşulacaqsınız?
- Bu barədə fikirləşirik. Bununla bağlı danışdıq, vəziyyətlə tanış olduq və İbrahim bəyin («Khazar İslands» layihəsini həyata keçirən «Avesta» konserinin rəhbəri - APA) təkliflərini də aldıq. Təbii ki, bu barədə qərarı bir günə, bir saata verə bilmərik. Bunun üçün bütün təklifləri öyrənirik. Mən özümlə texniki bir heyət gətirmişəm və bütün təklifləri öz aramızda bir daha qiymətləndirəcək, müzakirə edəcək və İnşallah birgə görə biləcəyimiz işləri, ortaq nöqtələri tapacağıq.
- Türkiyənin ən böyük investorlarındansınız. Azərbaycanda investisiya mühitini necə qiymətləndirirsiniz? Ümumiyyətlə, bura investisiya yatırımı ilə maraqlanmısız?
- Azərbaycana ilk dəfədir gəlirəm, amma sizin ölkə ilə çoxdan maraqlanıram. Son 7-8 ildə Azərbaycan adambaşına düşən milli gəlirinə görə dünyada ən böyük artım göstəricisinə malikdir. Bakını gəzəndə inkişafı, onun gətirdiyi dəyişiklikləri, müasir şəhər qurulduğunu görmək mümkündür. Burada gözəl layihələr həyata keçirilir. İnanıram ki, yaxın illərdə Bakı dünya səviyyəli şəhər olacaq. Azərbaycanda investisiya yatırmaq üçün şərait var. Amma mən investisiya yatırmaq məsələsində ilk növbədə «Khazar Islands» layihəsi ilə maraqlanıram və ortaq nöqtələrimiz olarsa, hökmən bu layihəyə qoşulacam.
- «Forbes»in qiymətləndirməsinə görə Türkiyənin ən varlı adamısınız. Hazırda Avropada gedən böhran dövründə daha çox pullarınızı artırmağa, yoxsa qoruyub saxlamağa çalışırsınız?
- Əlbəttə ki, artırmağa. Bizdə dayanmaq yoxdur, baş nazir Ərdoğanın sözü ilə desək, yola davam etməliyik. Dayansaq, hər şey bitər, ona görə də yatırımlara davam edirik. Təkcə bu il biz İstanbulda 10 minə yaxın evin tikintisinə başlamışıq.
- Yəni, tikinti sektorunda böhran artıq başa çatıb?
- Türkiyə potensialı böyük olan, iqtisadiyyatı sürətlə inkişaf edən ölkədir. Ona görə də işini düzgün planlaşdıranda hər yerdə iş qurmaq imkanı var. Amma gərək müştərini maraqlandırasan, onun tələblərinə cavab verəsən. Qiymətlərin yaxşıdırsa, hər zaman iş var. Türkiyədə isə inşaat sektoru iqtisadiyyatın lokomotividir. İqtisadi artımda böyük rolu var, ona görə də inşaat sektorunun vəziyyəti iqtisadiyyatın ən mühüm göstəricisidir.
- Türkiyədə xaricilərin əmlak alması asanlaşdırılıb. Sizcə, bu yenilik bazara necə təsir edəcək?
- Təəssüf ki, indiyədək azərbaycanlı və ya ərəb qardaşlarımız Türkiyədə əmlak ala bilmirdi. Bunun üçün şirkət yaradıb əmlakı onun vasitəsilə almalı və ya digər proseslərdən keçməli idi. Yeni qanun xaricilərin əmlak almasını asanlaşdırıb. Mənim fikrimcə, bu yeniliyin təkcə inşaat sektoruna deyil, ümumi iqtisadiyyata böyük dəstəyi olacaq. Hazırda Türkiyədə əsas problemlərdən biri maliyyələşdirmə ilə bağlıdır. Çünki ölkədə ildə 55-60 mlrd. dollar enerji haqqı ödənilir. Bu vəziyyətdə xaricilərin əmlak almaq üçün ödəyəcəyi pullar, məncə, Türkiyənin bu problemi həll etməsinə kömək edəcək.
- Xaricilərin Türkiyədə əmlak almasının asanlaşması yəqin qiymətləri bahalaşdıracaq...
- Hələ 300 il əvvəl Napoleon demişdi ki, «dünya tək dövlət olsaydı, paytaxtı İstanbul olmalıdır». Amma bu qədər mühüm nöqtədə olmasına baxmayaraq, qiymətlər hələ dünya səviyyəsinə çatmayıb. Dünyadakı qiymətləri bilirsiniz, İstanbulda isə orta qiymət 2000-2500 dollar/kv. metr arasındadır. Buna görə də xaricilərin əmlak almasının asanlaşdırılması qiymətlərin artmasına səbəb olacaq. Qeyd edim ki, xaricilərin, xüsusilə körfəz ölkələri vətəndaşlarının Türkiyədə əmlaka böyük tələbatı var. Tələblərin belə artması təbii ki, qiymətlərin də yüksəlməsinə səbəb olacaq.
- Sizin Türkiyədəki layihələrinizə Azərbaycandan investisiyaların cəlb olunması üçün çalışırsınızmı?
- Əlbəttə, əgər Türkiyədə iş qurmaq, investisiya yatırmaq istəyən olsa, bizim layihələr buna açıqdır. Mən azəri qardaşlarımızı Türkiyədə mənzil və əmlak almağa dəvət edirəm. Biz bunun üçün Bakıda satış ofisi də açacağıq. Qeyd edim ki, hələ bu qanunun (xaricilərin əmlak almasını asanlaşdıran qanun - APA) müzakirəsinə başlandığı mart ayından indiyədək, yəni son 2-3 ay ərzində bizim şirkət təkcə İstanbulda 850 dairə (mənzil) satıb. Qarşıdakı 2 il ərzində 2 mlrd. dollarlıq əmlak satmağı planlaşdırırıq.
- Son illər Azərbaycan turizm sektorunu inkişaf etdirməklə bölgənin turizm mərkəzlərindən birinə çevrilir. Sizcə, regiondakı belə böyük rəqabət şəraitində bunu həyat keçirmək mümkün olacaqmı?
- Əlbəttə mümkündür. Mən Bakını, Xəzər sahillərini gəzdim. Dənizi və havası çox gözəldir. Sizdə yeni tikilən gözəl hotellər də var. Mən bu sahədə Azərbaycanın və Bakının şanslı olduğunu düşünürəm və hesab edirəm ki, ölkəniz asanlıqla və tezliklə regionun istirahət mərkəzlərindən birinə çevriləcək. |
