Milli Məclisdə “Tikinti və Şəhərsalma Məcəlləsi”nə edilən dəyişikliyə əsasən fərdi yaşayış evlərinin tikintisi ilə bağlı proseslər sadələşdirilib. Belə ki, yeni qaydalara əsasən həyət evlərinin tikintisinə icazə tələb olunmayacaq. Əgər indiyədək fərdi evlərin inşası üçün müvafiq icra hakimiyyətindən icazə tələb olunurdusa, məcəllədə bu, “Məlumatlandırma icraatı” ilə əvəz olunub. Yəni ev tikmək istəyən vətəndaş onun layihəsini hazırlayır və həmin layihəni ərizə ilə birlikdə tikintiyə icazə verən quruma göndərir. Tikintiyə icazə verən qurum layihəni nəzərdən keçirir və onun Şəhərsalma Planına uyğun olub-olmadığını yoxlayır.
Məsələ ilə bağlı fikrini açıqlayan millət vəkili Tahir Rzayevin sözlərinə görə, layihəni alan qurum tikinti sahibinə iradını 3 ay müddətində bildirməlidir: “İrad bildirmə tikintiyə icazə verməmək deyil. İrad bildirən müvafiq qurum layihənin Şəhərsalma Planına uyğun olmadığını deyə bilər. Bu iradlar da konkret normalara əsaslanmalıdır. İrad əsasında göstəriş tərtib olunur və şəxs bu göstərişi yerinə yetirdikdən sonra işə başlayır. Amma bu qayda ancaq mərtəbələrinin sayı 3-dən, hündürlüyü 12 metrdən çox olmayan yaşayış evlərinə aiddir”.
Ekspertlər isə hesab edir ki, bu cür dəyişiklikləri fərdi yaşayış evlərinin tikintisi prosedurunda irəliləyiş hesab etmək olar. Yeni normativ qaydalar ilk növbədə ev tikmək istəyənləri süründürməçilikdən xilas edəçək. Əgər əvvəllər fərdi yaşayış evi tikmək istəyən şəxs bunun üçün onlarla qapını döymək məcburiyyətində qalırdısa, ediləcək dəyişikliklər bunun qarşısını alacaq, vaxt itkisi olmayacaq. Digər müsbət çəhət isə bu cür evlərin qeydiyyata alınması ilə bağlıdır. Çünki yeni normativ qaydalar bu proseduru sadələşdirməyi nəzərdə tutur. Ediləcək dəyişikliklərdən sonra tikiləcək fərdi yaşayış evlərinin sənədləşdirilməsi işləri də təbii ki, tam qeydiyyata alınma ilə yekunlaşacaq.
|
