 2013-cü ilin fevral ayında “Əmlak Bazarı İştirakçıları” İctimai Birliyinin monitorinq qrupu tərəfindən ilkin mənzil bazarı üzrə növbəti monitorinq aparılmışdır. Hələ ötən illərdən müəyyən səbəblərdən yarımçıq qalan və ya inşası zəif gedən yaşayış binalarının tikintisi bu ayda da davam edib.
Son aylarda təkrar mənzil bazarında baş verən qiymət artımları ilkin mənzil bazarına da təsirsiz ötüşməyib. İstər aktivlik, istərsə də qiymət artımı fevral ayına xas olub. Tələb əsasən kommunal şəraitli (istilik sistemi və ya qaz xətti olan), 3 otaqlı, orta mərtəbəli, 1 kv.metri 800-1000 manat məbləğində, sənədli (Çıxarışı olan) mənzillərdə müşahidə edilib.
Qiymət artımına bir çox amillərlə yanaşı tikinti həcminin azalması nəticəsində ucuz qiymətli və keyfiyyətli mənzillərin təklif portfelində tədricən tükənməsi və nəticədə əvvəllər satılmayan (yüksək qiymətə bazara təklif edilən) mənzillərin təklif portfelində paylarının artması səbəb olub.
Beləliklə fevralda aparılan araşdırmalar zamanı paytaxtın ilkin mənzil bazarında baş verən qiymət dəyişməsi 1,8 % təşkil edib. Bağlanan əqdlərin dinamikası da yüksələn tendensiya ilə müşahidə edilib.
Bakı şəhəri üzrə ilkin mənzil bazarında araşdırmaya məruz qalan çoxmənzilli binaların sayında azalma baş verib. Satışdan çıxan binaların sayı ötən aydakı 406 ədədə qarşı 402 olub. Satışdan çıxan binalar əsasən Nərimanov, Yasamal, Xətai rayonları olub. Paytaxt üzrə bünövrəsi qoyulan binalar olsa da, satışa çıxarılmadığından siyahıya daxil edilməyib. Tikinti şirkətlərin sayı ötən aydakı 139 ədədə qarşı 135 -ə düşüb.
Qiymətlər
Qeyd etdiyimiz kimi, fevral ayında ilkin mənzil bazarı üzrə qiymətlər artıma meylli olub və paytaxt üzrə bazara təklif edilən yeni tikililərdə bir kvadrat metr üzrə orta qiymət göstəricisi ötən aydakı 839,6 manata qarşı 1,7% artaraq 853,6 manat təşkil edib. Ötən rübün müvafiq dövrü ilə müqayisədə qiymət dəyişməsi 5,1%, ötən ilə nisbətdə isə 4,0% artımla yadda qalıb.
2008-ci ilin sentyabr ayı (böhran dövrü) ilə müqayisədə isə qiymət azalması 28,5% təşkil edib. Qeyd edək ki, həmin dövr üçün 1 kv.metr mənzilin qiyməti 1194 manat olub.
Araşdırmalar əsasən tədqiq edilən ayda alıcı aktivliyinin əsas hissəsi bağlanmış müqavilələr üzrə əsasən 3 otaqlı mənzillərdə qeydə alınıb. Beləliklə, yanvar ayında satılan yeni mənzillərin təxminən 39,2%-i 3 otaqlıların, 30,2%-i 2 otaqlıların, yerdə qalan 30,6 %-i isə digər 1, 4 və 5 otaqlıların payına düşüb.
3 otaqlı mənzillərin təklif payı bütün rayonlarda yüksək göstərici ilə qeydə alınıb. 5 otaqlı mənzillər əsasən şəhərin 1-ci zonasında, 1 otaqlılar isə daha çox 3-cü zonada üstünlük təşkil edib.
İndeks
Orta qiymətdə 1,7% artım qeydə alındığından qiymət indeksi yanvar ayındakı 321.2 səviyyəsindən 5,4 bənd artaraq 326.5 bənd səviyyəsində qərarlaşıb.
“Əmlak Bazarı İştirakçıları” İctimai Birliyinin monitorinq qrupu | 
